Presidenti amerikan Donald Trump e ka kthyer vëmendjen e tij te armiqësitë e fundit midis Indisë dhe Pakistanit, të cilat përfunduan javën e kaluar pasi bisedimet e udhëhequra nga SHBA-të rezultuan në një armëpushim.

“Të dyja kanë udhëheqës shumë të fuqishëm, udhëheqës shumë të fortë, udhëheqës të mirë, udhëheqës të zgjuar. Dhe, gjithçka u ndal. Shpresojmë që do të mbetet kështu, por gjithçka u ndal”, tha ai.

“Miliona njerëz mund të kishin vdekur nga ai konflikt që filloi i vogël dhe po bëhej gjithnjë e më i madh çdo ditë”, shtoi presidenti amerikan.

Trump vlerëson punën e Sekretarit të tij të Shtetit, Marco Rubio, dhe zëvendëspresidentit JD Vance, duke e pyetur të parin nëse mendon se India dhe Pakistani tani do të ulen për darkë së bashku.

“Mendoj se ata në të vërtetë po shkojnë mirë. Ndoshta mund t’i bashkojmë pak, Marco, ku të dalin dhe të hanë një darkë të këndshme së bashku. A nuk do të ishte mirë kjo”, tha Trump. /Telegrafi/